Jan 28, 2014

Remastersys எனும் அற்புத ஆணை - உங்கள் உபுண்டு இயங்குதளத்தை உங்கள் நண்பர்களுடன் பகிர்ந்து கொள்ளலாம்

இந்த பதிவை படிப்பதற்கு முன் ஒரு தேநீரோ அல்லது காபியோ(குளம்பி) சாப்பிட்டுவிட்டு வாங்க. கொஞ்சம் பெரிய பதிவாக எழுதிவிட்டேன். படித்தபிறகு தலைவலி வந்து விடக்கூடாதல்லவா! அதற்குத்தான்,


ஆரம்ப நிலை பயனாளர்களுக்கும், லினக்ஸ் இயங்குதளத்தை பயன்படுத்திப் பார்க்க வேண்டும் என நினைக்கும் புதியவர்களுக்கும், மாணவர்களுக்கும், விண்டோஸ் இயங்குதளத்திலிருந்து புலம் பெயர்ந்து வந்து லினக்ஸ் இயங்குதளத்திற்குள் அடைக்கலமாக வேண்டும் என நினைப்பவர்களுக்கும் என அனைத்து தரப்பினருக்கும் ஏற்ற வகையில் சிறந்த லினக்ஸ் வழங்கலாக(Distribution) உபுண்டு இயங்குதளம் இருந்து வருகிறது. அனைவராலும் விரும்பி பயன்படுத்தப்படும் இந்த உபுண்டு இயங்குதளத்தை இணையதளத்திலிருந்து இலவசமாகவே தரவிறக்கம் செய்து பயன்படுத்திக் கொள்ளலாம். 100% Free of Cost, 100% Freedom. இணையத்தில் இருந்து தரவிறக்கம் செய்யப்படும் உபுண்டு இயங்குதளம் ISO கோப்பாக இருக்கும் அந்த ISO கோப்பினை CD/DVD, Pendrive அல்லது Hard Disk என ஏதாவது ஒன்றின் மூலமாக நமது கணினியில் நிறுவிக்கொள்ளலாம்.

ஏற்கனவே உங்களது கணினியில் நிறுவப்பட்டு இருக்கும் விண்டோஸ் இயங்குதளத்துடன் சேர்த்து உபுண்டு லினக்ஸ் இயங்குதளத்தையும் பயன்படுத்திக் கொள்ளலாம்(Dual Booting முறையில்). விண்டோஸ் இயங்குதளத்திற்கு எந்தவிதமான பாதிப்பும் ஏற்படாது என்பதோடு மட்டுமில்லாமல் கணினியை இயக்கியவுடன் நீங்கள் எந்த இயங்குதளத்திற்குள் செல்ல வேண்டும்? என்று கேட்கும். விண்டோஸ் இயங்குதளத்திற்குள் போக வேண்டுமானால் விண்டோஸிற்குள் போகலாம், உபுண்டுவிற்குள் போக வேண்டுமானால் உபுண்டுவிற்குள் செல்லலாம். உங்களோட விருப்பம்தான்.

இவ்வளவு சிறப்புகளை கொண்ட உபுண்டு லினக்ஸை நிறுவிய பிறகு பெரும்பாலும் புதிய பயனாளர்கள் இயக்கிப் பார்ப்பது அவர்களுக்கு பிடித்த பாடல்களைத்தான். பெரும்பாலும் பாடல்கள் mp3 வடிவில் இருக்கும். ஆனால் இந்த mp3 கோப்புகள் உபுண்டுவில் இயங்காது. சரி பாட்டைத்தான் கேட்க முடியவில்லை ஒரு படத்தையாவது(திரைப்படம்) பார்ப்போம் என இயக்கினால் அதுவும் இயங்காது. ஆனால் wav, ogg, ogv வடிவ கோப்புகள் இயங்கும். ஏங்க மற்ற வடிவில் இருக்கும் கோப்புகள் இயங்காது? எனக் கேட்டால், அவையெல்லாம் உரிமம் பெற்றவை! அதனால இயங்காது.

சரிங்க! அதெல்லாம் இருக்கட்டும்ங்க. பாட்டு, படமெல்லாம் உபுண்டுவுல பார்க்க முடியுமா? முடியாதா? அத மொதல்ல சொல்லுங்க அப்பறம் எதாஇருந்தாலும் பேசிக்குவோம்னு சொல்றீங்களா? முடியும்ங்க! முடியும்! உபுண்டுவில் செய்ய முடியாததுன்னு ஒன்று இருக்கா என்ன! முடியுமா? அதெப்படிங்க? சொல்றேன் கேளுங்க முனையத்தை திறந்து கீழ்காணும் கட்டளைகளை ஒன்றன்பின் ஒன்றாக இயக்குங்க.

sudo apt-get update
sudo apt-get install ubuntu-restricted-extras

ஆனால் இந்த கட்டளைகளெல்லாம் வேலை செய்யணும்னா உங்க கணினியில் இணைய அவசியம் இணைப்பு இருக்க வேண்டும். இணைய இணைப்பு இல்லையென்றால் மேற்காணும் பொதிகள்(Packages) நிறுவப்படமாட்டாது.

என்னோட கணினியில இணைய இணைப்பு இல்லையே என்ன செய்யுறது? இணைய மையத்திற்கு சென்று தரவிறக்கம் செய்துகொண்டு வந்து உபுண்டுவில் நிறுவ முடியுமா? னு கேட்குறீங்க அப்படித்தானே?

விண்டோஸ் இயங்குதளத்தில் மென்பொருள் நிறுவுவது போல, உபுண்டுவிலும் நமக்கு தேவையான மென்பொருள்களை,பொதிகளை தரவிறக்கம் செய்துகொண்டு வந்து நிறுவலாம். ஆனால் என்ன பிரச்சனையென்றால், அவ்வாறு தரவிறக்கம் செய்து கொண்டு வந்து நிறுவும் போது, மென்பொருள் அல்லது பொதிகள் நிறுவப்படுவதற்கு சில துணைப் பொதிகள் அல்லது அவசியமான சில பொதிகள் தேவைப்படும். தரவிறக்கம் செய்து கொண்டு வந்த பொதிகளை நிறுவ முற்படும் போதே, நிறுவுதலுக்கு முன்பே அந்த பொதிகளெல்லாம் நிறுவப்பட்டுள்ளதா? என சோதித்துப் பார்க்கும். இல்லையென்றால் நிறுவுதலுக்கு தேவையான பொதிகளை சுட்டிக்காட்டும். பிறகு மறுபடியும் அந்த பொதிகளை தரவிறக்கம் செய்வதற்காக இணைய மையத்திற்கு செல்ல வேண்டும். மறுபடியும் ஏதாவது சில பொதிகள் தேவை என சொன்னால் அதற்காக மறுபடியும் இணைய மையத்திற்கு செல்ல வேண்டும். இந்த ஒரு பிரச்சனைக்காகத்தான் மென்பொருள்களை தரவிறக்கம் செய்து நிறுவுவதற்கு பெரும்பாலும் பரிந்துரைப்பதில்லை.

வெளிப்படையாக சொல்ல வேண்டுமானால், இணைய இணைப்பு இல்லாமல் உபுண்டுவில் எந்தவொரு பொதிகளையோ அல்லது மென்பொருளையோ நிறுவுவது என்பது எளிதான காரியமல்ல. அதற்காக புதிய பயனாளர்கள் பயப்பட வேண்டாம்.

அதேநேரத்தில், உங்களிடம் இணைய இணைப்பு இருந்தால் தேவையான பொதிகளை, உபுண்டுவே இணையத்தில் இருந்து பெற்றுக்கொண்டு வெற்றிகரமாக மென்பொருளை நிறுவிக் கொடுத்துவிடும். இணையத்திலிருந்து நேரடியாக மென்பொருள்களை நிறுவுவது என்பது லினக்ஸில் உள்ள ஒரு அற்புதமானவசதி. ஆனால் இந்த வசதி எந்தவொரு விண்டோஸ் பதிப்பிலும் கிடையாது. எந்த மென்பொருளானாலும் தரவிறக்கம் செய்த பின்பே நிறுவ முடியும்.

இணைய இணைப்பு உள்ள கணினியாக இருந்தால் உபுண்டுவில் எந்தவொரு மென்பொருளையும் மிகவும் எளிதாக நிறுவி விடலாம்.

உபுண்டுவை நண்பர்களுக்கு நிறுவிக்கொடுக்கும் போது அவர்கள் முதலில் சிந்திப்பது, எதிர்பார்ப்பது எல்லாமே விண்டோஸைப் போலவே உபுண்டுவை பயன்படுத்த முடியுமா என்றுதான். User Interface என்று வரும்போது விண்டோஸைக் காட்டிலும் உபுண்டுதான் பயன்படுத்த எளிமையாக இருக்கும். விண்டோஸை நீண்டகாலமாக பயன்படுத்திய நண்பர்கள், உபுண்டுவை பயன்படுத்திப் பார்த்த பின்பு அதை கண்டிப்பாக உணர்வார்கள். ஆனால் லினக்ஸ் என்பது பயன்படுத்துவதற்கு கடினமாக இருக்கும் என்றே பலபேர் நினைத்துக்கொண்டிருக்கின்றனர். அது தவறு, லினக்ஸ் என்பது Text Mode Interface தான் என்ற காலம் மலையேறிவிட்டது.

நம் நண்பர்களிடம் உபுண்டுவை பயன்படுத்தி பாருங்களே என பரிந்துரைக்கும்போது, வேண்டாம் என்று சொல்லாமல், அதனாலென்ன பயன்படுத்திப் பார்ப்போமே என பயன்படுத்திப் பார்ப்பதற்கு ஆர்வத்துடன் முன் வருகிறார்கள். என்னுடைய அருமை தோழர் சிவக்குமார்(பெங்களூருவில் வேலை பார்த்து வருகிறார்) கூறும்போது, விண்டோஸைக் காட்டிலும் உபுண்டு பயன்படுத்த மிகவும் எளிமையாகவும், அதே நேரத்தில் வேகமாகவும் இருக்கிறது. குறிப்பாக இணையம் பயன்படுத்தும் போது வேகம் நன்றாக இருக்கிறது எனவும் கூறினார்.

அவ்வாறு ஆர்வத்துடன் வரக்கூடிய நண்பர்களுக்கு வெறுமனமே உபுண்டுவை மட்டும் நிறுவிக்கொடுக்காமல், விண்டோஸில் இருந்து லினக்ஸிற்கு(உபுண்டு) மாறும் ஒரு பயனாளருக்கு என்னென்ன மென்பொருள்களெல்ல்லாம் தேவைப்படுமோ அவை அனைத்தையும் நிறுவி ஒரு முழுமையான பயன்படுத்தத்தக்க இயங்குதளமாக, உபுண்டுவை நிறுவிக்கொடுத்தால் நன்றாக இருக்குமல்லவா! கண்டிப்பாக இருக்கும். இவ்வாறு செய்வதன் மூலம் புதிய பயனாளர்களையும், ஆரம்ப நிலைபயனாளர்களையும் உபுண்டுவை நோக்கி நாம் மிகவும் எளிமையாக கவர்ந்து இழுக்கலாம். அதெல்லாம் சரிதாங்க, உபுண்டுவை முழு பயன்பாட்டிற்கு ஏற்ப ஒருவருக்கு நிறுவிக்கொடுக்க வேண்டுமானால், அதற்கு இணைய இணைப்பு வேண்டுமே என்ன செய்வது? அதுமட்டுமில்லாமல், புதிதாக ஒருவருக்கு உபுண்டு லினக்ஸை அறிமுகப்படுத்தி, நிறுவிக்கொடுக்கும் போதெல்லாம் இதைச் செய்ய வேண்டுமே. இது கொஞ்சம் கடினமான விஷயமாச்சேனு கேட்கிறீங்க அப்படித்தானே. நீங்கள் கேட்பது எனக்கு புரிகிறது.

சாதரண மேசைக்கணினி/தனிநபர் பயனாளர்கள் கணினியில் அதிகமாக செய்யும் வேலைகள்:
1. பாடல்கள் கேட்பது, திரைப்படம் பார்ப்பது
2. இணையம் பயன்படுத்துவது
3. Microsoft Office ஐ பயன்படுத்துவது
4. கணினியில் இருக்கும் கோப்புகளை பென்டிரைவ் மற்றும் நினைவக அட்டைகள் போன்றவற்றில் பரிமாரிக்கொள்வது.
5. CD/DVD களில் உள்ளவைகளை கணினியில் இயக்கிப் பார்ப்பது.
6. நிரல்கள் எழுதிப் பார்ப்பது
7. Photoshop போன்ற மென்பொருள்களை பயன்படுத்தி புகைப்படங்களில் மாற்றங்கள் செய்வது.இது போக அவரவர் பயன்பாட்டைப் பொறுத்து இவைகளில் சில மாறுபடலாம்.

மேற்காணும் அனைத்து வேலைகளையும் உபுண்டுவிலும் செய்ய முடியும். ஆனால் மேலே சொல்லப்பட்டுள்ள வேலைகள் அனைத்தையும் உபுண்டுவை நிறுவிய உடனேயே நாம் செய்ய முடியாது. சில பொதிகளை நிறுவிய பின்புதான் செய்ய முடியும். அதற்கு இணைய இணைப்பு தேவை. இணைய இணைப்பு இருந்துவிட்டால் ஒன்னும் பிரச்சனையில்லை, ஆனால் இணைய இணைப்பு இல்லாவிட்டால் என்ன செய்வது? சிக்கல்தான்.

சரி ஒரு பேச்சுக்காக இப்படி வச்சுக்கங்க, நீங்கள் பயன்படுத்திக் கொண்டிருக்கும் உபுண்டுவில் இருக்கும் அனைத்து மென்பொருள்களுடன் உபுண்டுவை பேக்கப் எடுத்து அதை அப்படியே இணைய இணைப்பே இல்லாத உங்களுடைய நண்பரின் கணினியில் நிறுவினால் எப்படி இருக்கும்!!! என்ன சொல்றீங்க? அட சூப்பரா இருக்கும்ங்க. அப்படி ஏதாவது ஒரு வழி இருந்தா சொல்லுங்க கதிர்வேல் ஒரு கலக்கு கலக்கிப்புடுறேங்கிறீங்க அப்படித்தானே. இப்படி செய்ய வழி இருக்குங்க, அதற்காகத்தானே இந்த பதிவே.

அடுத்து, உபுண்டுவை பயன்படுத்திக்கொண்டிருக்கும்போது எதிர்பாராத விதமாக ஏதேனும் சிக்கல் ஏற்பட்டால், அந்த பிரச்சனையை சரிசெய்யவே முடியாது என்ற நிலை வரும்போது உபுண்டுவை மறுபடியும் நிறுவுவதுதான் சிறந்தது. உதாரணமாக: Graphics Driver Installation ஐ நிறுவினால் Blank Screen னோடு நின்றுவிடுதல். புதிதாக நிறுவிய பின்பு நமக்கு தேவையான மென்பொருள் அனைத்தையும் மறுபடியும் இணையத்தின் மூலமாக உபுண்டுவில் நிறுவ வேண்டும். இதனால் நம்முடைய நேரமும், உழைப்பும் கடுமையாக வீணாகும். அத்துடன் இதற்கு குறிப்பிட்ட விலையையும் நாம் கொடுக்க வேண்டி வரும். அதெப்படினு கேக்குறீங்க, உதாரணத்துக்கு 3GB அளவிற்குத்தான் நீங்கள் இணைய இணைப்பு வாங்கி வைத்திருக்கிறீர்கள், அந்த அளவு முடிந்து விட்டது. புதிதாக நிறுவிய உபுண்டுவில் மென்பொருள்களை நிறுவுவதற்காக இணையம் தேவைப்படும். உதாரணமாக 2GB அளவிற்கு என்று வைத்துக்கொள்வோமே, இதற்காக நீங்கள் பணம் செலுத்தி, இணைய இணைப்பை பெற வேண்டும். அந்த தொகை உங்களுக்கு வீண் செலவுதானே.

நமக்கு தேவையான அனைத்து மென்பொருள்களையும் நிறுவிய பிறகு, அதை ஒரு தனி உபுண்டுவாக மறுஉருவாக்கம் செய்து, நிறுவத்தக்க வகையில் ஒரு ISO கோப்பாக எடுத்து வைத்துக்கொண்டு தேவைப்படும்போதெல்லாம் நிறுவிப் பயன்படுத்தினால் எப்படி இருக்கும்??? இப்படி ஒரு வசதி இருந்தால் நமக்கு எவ்வளவு நேரம் மிச்சமாகும், எவ்வளவு சந்தோஷமாக இருக்கும், நினைத்துப் பாருங்கள். இப்படியெல்லாம் செய்ய முடியுமா? அது சாத்தியமா? செய்ய முடியும்ங்க, சாத்தியமானதுதாங்க இதுதான் கேள்விகளுக்கான பதில்.

மேற்கண்ட இரண்டு தேவைகளுக்கும்  தீர்வாக இருப்பதுதான் Remastersys எனும் அற்புதமான ஆணை(command).

இந்த Remastersys கட்டளையினால் என்ன பயன்?

நிறைய இருக்கிறது சொல்லிக்கொண்டே போகலாம், அவைகளில் சில கீழே கொடுக்கப்படுகிறது,
1. Remastersys மூலமாக உபுண்டுவில் நிறுவப்பட்டுள்ள மென்பொருள்கள் மற்றும் பொதிகளுடன்(Installed Packages) உபுண்டுவை முழுமையாக பேக்கப் செய்து கொள்ளலாம். அதை உங்கள் நண்பருடன் பகிர்ந்து கொள்ளலாம். நண்பரின் கணினியில் நிறுவலாம்.

2. தேவையான மென்பொருள்கள் அனைத்தையும் உபுண்டுவில் நிறுவிவிட்டு, அந்த உபுண்டுவை மறு உருவாக்கம் செய்து மற்றவர்களினுடைய கணினியில் நிறுவும் போது, மறுபடியும் இணையத்தின் மூலமாக மென்பொருள்களை நிறுவிக்கொண்டிருக்க வேண்டிய அவசியமில்ல. ஏற்கனவே நிறுவியிருந்த மென்பொருள்கள் அல்லாமல் புதியதாக ஏதாவது ஒரு மென்பொருள் தேவைப்பட்டால் மட்டும் இணையத்திலிருந்து நிறுவிக்கொள்ளலாம். இதன் மூலமாக உங்கள் நண்பரை உபுண்டுவின் பக்கம் கவந்திழுக்கலாம். இதனால் நேரத்தையும், இணைய இணைப்பிற்கான செலவையும் உங்கள் நண்பருக்கு மிச்சப்படுத்திக் கொடுக்கலாம்.

3. பெரும்பாலும் உபுண்டுவில் எந்த பிரச்சனையும் ஏற்படாது அதையும் மீறி ஏதாவது பிரச்சனை ஏற்பட்டு விட்டால் திரும்பவும் நமக்கு தேவையானவற்றை இணையத்திலிருந்து நிறுவ வேண்டுமே என்ற பயமும், கவலையும் இல்லாமல் இருக்கலாம்.

உபுண்டுவை பேக்கப் எடுப்பதற்கு முன் செய்ய வேண்டியவை:

1. /home அடைவிற்குள் போதுமான அளவு இடம் இருக்கிறதா என்று பார்த்துக் கொள்ள வேண்டும். இந்த இடத்தின் அளவானது நீங்க பேக்கப் எடுக்கப்போகும் உபுண்டுவில் எந்தளவிற்கு மென்பொருள்கள் நிறுவப்பட்டுள்ளது என்பதைப் பொறுத்து மாறுபடும்.

2.முனையத்தில் sudo apt-get clean autoclean என்ற கட்டளையை இயக்கி apt-cache ஐ சுத்தம் செய்யவும்.



3. மடிக்கணினியாக இருந்தால் தேவையான அளவு மின்கலனை நிறைத்து வைத்துக்கொள்ளுங்கள்.

Remastersys ஐப் பற்றிய பொதுவான கேள்விகள்:

1.உபுண்டுவை பேக்கப் எடுக்கும் போது User னுடைய கோப்புகளும் சேர்த்து பேக்கப் செய்யப்படுமா?

செய்யப்படமாட்டாது.

2.பேக்கப் செய்யப்படும் உபுண்டு, எந்த கோப்பு வடிவில் சேமிக்கப்படும்?

பகிர்ந்து கொள்ளத்தக்க வகையில் ISO கோப்பு வடிவில் சேமிக்கப்படும்.

3.பேக்கப் செய்யப்படும் ISO கோப்பு எங்கு சேமிக்கப்படும்?

/home/remastersys/remastersys/ எனும் அடைவிற்குள் சேமிக்கப்படும். sudo remastersys dist iso ubuntu_os_backup_filename.iso என்ற கட்டளையை இயக்கும் போது நீங்கள் ISO கோப்பிற்கு என்ன பெயர் கொடுத்தீர்களோ அந்த பெயரில் சேமிக்கப்பட்டிருக்கும். உதாரணமாக. remastersys dist iso mycustomubuntu.iso என கொடுத்திருந்தால்  mycustomubuntu.iso என்ற பெயரில் சேமிக்கப்படும்.

4.பேக்கப் செய்யப்பட்ட ISO கோப்பினை CD/DVD மற்றும் Pendrive போன்றவைகளில் Bootable ஆக மாற்றி பயன்படுத்திக்கொள்ள முடியுமா?
தாராளமாக பயன்படுத்திக்கொள்ளலாம். startup disk creator tool லும் பயன்படுத்திக்கொள்ளலாம். LIVE OS ஆகவும் பயன்படுத்திக்கொள்ளலாம்.

5. root user னுடைய கோப்புகளும் பேக்கப் செய்யப்படுமா?
ஆமாம். பேக்கப் செய்யப்படும்.

6.என்னுடைய உபுண்டுவில் நிறுவப்பட்டிருக்கும் அத்துனை மென்பொருள்களும், remastersys கட்டளையை பயன்படுத்தி தயார் செய்யப்பட்ட ISO கோப்பில் இருக்குமா? அல்லது விடுபட்டிருக்குமா?
அனைத்து மென்பொருள்களும் ISO கோப்பில் இருக்கும். எந்த மென்பொருளும் விடுபட்டிருக்காது.

7. அனைத்து உபுண்டு பதிப்புகளிலும் Remastersys வேலைசெய்யுமா? அல்லது அண்மைய பதிப்புகளில் மட்டும்தான் வேலை செய்யுமா?
அனைத்து பதிப்புகளிலும் வேலை செய்யும். அண்மைய பதிப்புகளிலும் வேலை செய்யும்.

Remastersys ஐ கணினியில் நிறுவுவது எப்படி?

படி பூஜ்யம்:

கணினியில் இணைய இணைப்பு இருக்க வேண்டும்.

படி ஒன்று:



முனையத்தில் sudo nautilus எனக் கொடுத்து Nautilus File Manager ஐ திறந்து கொள்ளுங்கள். அதில் /etc/apt/sources.list எனும் கோப்பைத் திறந்து, அதில் கடைசியாக கீழ்காணும் வரிகளைச் சேர்க்கவும். (கீழ்காணும் வரி உபுண்டு 12.04 பதிப்புக்குத்தான் பொருந்தும். நீங்கள் வேறொரு பதிப்பை பயன்படுத்தி வந்தால். அதற்கான வரிகளைப் பெற இங்கு செல்லவும். http://www.remastersys.com)

#Remastersys Precise
deb http://www.remastersys.com/ubuntu precise main



படி இரண்டு:
முனையத்தை(Terminal) திறந்து sudo apt-get update எனும் கட்டளையை இயக்கவும்.



படி மூன்று:
sudo apt-get install remastersys* எனும் கட்டளையை முனையத்தில் கொடுத்து இயக்கவும்.



மேற்காணும் கட்டளைகள் இயக்கப்பட்டவுடன், உபுண்டுவில் remastersys நிறுவப்பட்டுவிடும். இப்பொழுது முதல் கட்ட பணி நிறைவடைந்து விட்டது. அடுத்து என்ன?



உபுண்டுவை பேக்கப் செய்வது எப்படி?

முனையத்தை திறந்து அதில் முதலாவதாக sudo remastersys dist cdfs எனும் கட்டளையை இயங்குங்கள். இந்த கட்டளைதான் உங்களுடைய உபுண்டுவை முழுமையாக பேக்கப் செய்யப்போகும் கட்டளையாகும். ஆனால் முழுமையான ISO கோப்பாக உருவாக்கப்பட்டிருக்காது.



அடுத்ததாக முனையத்தில் sudo remastersys dist iso mycustomubuntu.iso எனும் கட்டளையை இயக்கவும். இந்த கட்டளைதான் நாம், மற்றவர்களுடனும், நண்பர்களுடனும் பகிர்ந்துகொள்வதற்கு ஏற்ற ISO கோப்பாக உருவாக்கி கொடுக்கும்.



இந்த கட்டளை முழுமையாக செயல்பட்ட பின்பு உங்கள் உபுண்டுவினுடைய முழு வடிவிலான, நிறுவிக்கொள்ளத்தக்க வகையிலான, ISO கோப்பு /home/remastersys/remastersys/ எனும் அடைவிற்குள் சேமிக்கப்பட்டிருக்கும்.



ISO கோப்பு எந்த விதமான பிழையும் இல்லாமல் தயார் செய்யப்பட்டுள்ளதா என்று சோதித்துப் பார்க்க வேண்டுமானால். முனையத்தில் md5sum /home/remastersys/remastersys/yourfilename.iso எனக் கொடுக்கவும். அதன்பின், ஏற்கனவே உருவாக்கப்பட்டிருக்கும் /home/remastersys/remastersys/yourfilename.iso.md5sum எனும் கோப்பில் இருக்கும் எண்ணும். md5sum /home/remastersys/remastersys/yourfilename.iso கட்டளையின் வெளியீடாக கிடைக்கும் எண்ணும் ஒரே எண்ணாக இருந்தால், ISO கோப்பு 100% சரியாக இருக்கிறது என்று அர்த்தம்.



அதன்பின் இந்த iso கோப்பை வேறொரு இடத்தில் copy செய்து வைத்துக் கொள்ளுங்கள். இந்த ISO கோப்பினை CD/DVD யில் Bootable ஆக Write பண்ணிக்கலாம் அல்லது Startup Disk Creator மூலம் பென்டிரைவில் Bootable மாற்றியும் நிறுவுதலுக்கு பயன்படுத்திக்கொள்ளலாம். அடுத்த முறை உங்கள் நண்பரினுடைய கணினியில் உபுண்டுவை நிறுவும் போது இந்த iso கோப்பினைக் கொண்டே நிறுவுங்கள். உபுண்டுவைப் பயன்படுத்திப் பார்க்கும், உங்களை நண்பரை பிரமிக்க வையுங்கள். உபுண்டு crash ஆகிவிட்டால் என்ன செய்வது என்ற பயத்தையும் விடுங்கள்.

இறுதியாக முனையத்தில் sudo remastersys clean எனக்கொடுத்து remastersys உருவாக்கிய கோப்புகள் அனைத்தையும் clean செய்து கொள்ளுங்கள். இல்லையென்றால் இது தேவையில்லாமல் இடத்தை அடைத்துக்கொண்டிருக்கும்.



இதுதொடர்பாக எந்த சந்தேகமாக இருந்தாலும் பின்னூட்டம் இடுங்கள். உங்களுடைய சந்தேகங்கள் உடனுக்குடன் தீர்த்து வைக்கப்படும். யாம்பா கதிர்வேலு இவ்வளவு பெரிய பதிவை எழுதியிருக்குறீயே, எழுதுறதுக்கு எவ்வளவு நேரம்பா ஆச்சு?னு யாரோ அக்கறையோட கேக்குற மாதிரி இருக்கு. உணவு மற்றும் நண்பர்களுடன் தேநீர் அருந்திய நேரம் போக 9-மணி நேரம் ஆச்சுங்க! அட உண்மைதாங்க!

References:
2.திருக்கோணமலை நிகழ்வட்டு - Trincomalee GNU/Linux Live CD
3.உபுண்டுவில் remastersys பயன்படுத்தி distro/livecd/dvd copy எடுத்தல்

Remastersys மூலம் பேக்கப் செய்யப்பட்ட என்னுடைய Ubuntu 12.04.2 LTS Desktop



என்னுடைய Ubuntu Desktop (இரண்டு படத்தையும் ஒப்பிட்டுப் பாருங்கள் அனைத்து மென்பொருள்களும் இரண்டிலும் இருக்கும்)


Jan 24, 2014

உபுண்டு 12.04 இல் NetBeans IDE நிறுவுதல்

கணினி நிரலாளர்களும், மாணவர்களும் NetBeans IDE ஐ நிரல்கள் எழுதுவதற்காக பயன்படுத்துகின்றனர். பொதுவாக IDE க்கள் அனைத்துமே நாம் நிரல் எழுதும் வேலையை சுமூகமாக்குகிறது. Eclipse ஐப் போன்றே NetBeans IDE யும் பயன்படுத்துவதற்கு சிறப்பாக இருக்கும். விண்டோஸ், ஆப்பிள் மற்றும் லினக்ஸ் இயங்குதளங்களில் NetBeans IDE நிறுவி பயன்படுத்த முடியும்.

NetBeans IDE யின் அண்மைய பதிப்பு 7.4 ஆகும். NetBeans இணையதளத்திலிருந்து லினக்ஸிற்கான பதிப்பை தரவிறக்கம் செய்து கொள்ளலாம். தரவிறக்கம் செய்வதற்கான சுட்டி இங்கே. 



All எனும் வகையில் உள்ள NetBeans ஐ நான் முனையத்தில் wget கட்டளை மூலமாக தரவிறக்கம் செய்தேன். நீங்கள் உங்களுக்கு உகந்த முறையில் தரவிறக்கம் செய்து கொள்ளுங்கள். 198MB அளவு இருந்தது. netbeans-7.4-linux.sh எனும் ஒற்றை கோப்பாகத்தான் தரவிறக்கம் ஆகும்.

கவனத்திற்கு:
Netbeans ஐ நிறுவ வேண்டுமானால் உங்கள் உபுண்டு இயங்குதளத்தில் Java அவசியம் நிறுவப்பட்டிருக்க வேண்டும். உபுண்டுவில் ஜாவவை நிறுவுவது எப்படி என தெரிந்து கொள்ள நான் எழுதிய பதிவிற்கு செல்லவும்.

முனையத்தில், cd கட்டளையின் உதவியுடன் கோப்பு தரவிறக்கம் ஆன அடைவுக்குள் செல்லவும். சென்ற பிறகு முனையத்தில் sudo chmod +x netbeans-7.4-linux.sh என கொடுக்கவும். இந்த கட்டளை netbeans-7.4-linux.sh எனும் கோப்பினை Executable ஆக மாற்றும்.


அதன்பின் முனையத்தில் sudo ./netbeans-7.4-linux.sh எனும் கட்டளையை இயக்கவும். சிறிது நேரத்தில் உங்களுக்கு Netbeans நிறுவுதலுக்கான Graphical Interface கிடைக்கும். அதன்பின் நிறுவுதலை நீங்கள் எளிமையாக தொடரலாம்.











Jan 22, 2014

External Hard Disk மூலம் ISO கோப்பிலிருந்து நேரடியாக உபுண்டுவை நிறுவும் முன் செய்ய வேண்டியவை

External Hard Disk மூலம் ISO கோப்பிலிருந்து நேரடியாக உபுண்டுவை நிறுவும் போது எந்த பார்ட்டிசியனில் உபுண்டுவினுடைய ISO கோப்பினை வைத்திருக்கிறோமோ அந்த பார்ட்டிசியன் /isodevice என அடையாளப்படுத்தப்படுகிறது.

நிறுவுதலின் போது, அதாவது Partition செய்வதற்கு முன்பு Mount ஆகியிருக்கும் Device களை unmount செய்ய வேண்டும் எனக்கேட்கும் போது இந்த பிழைச்செய்தி கிடைக்கிறது. இதற்கான தீர்வு என்னவென்றால், நிறுவுதலை ஆரம்பிப்பதற்கு முன்பாக முனையத்தைத்(Terminal) திறந்து sudo umount -l -r -f /isodevice என்ற கட்டளையை இயக்கவும். இந்த கட்டளையை இயக்கிய பிறகு எந்த பிழைச்செய்தியும் தெரிவிக்காமல் உபுண்டு நிறுவுதலை செய்ய முடிகிறது.

உதவி:

Jan 15, 2014

லினக்ஸ் பாதி, விண்டோஸ் பாதி கலந்து செய்த கலவை நான்! - உபுண்டு லினக்ஸிற்குள் விண்டோஸ் 7 இயங்குதளத்தை நிறுவுவது எப்படி?




நேற்றுதான் என்னுடைய உபுண்டு லினக்ஸில் Virtual Box ஐ நிறுவினேன். Wine Software மூலமாக விண்டோஸில் இயங்கக்கூடிய மென்பொருள்களை லினக்ஸில் இயக்க முடியும் என்றாலும். அனைத்து மென்பொருள்களும் எந்தவிதமான பிரச்சனையும் இல்லாமல் Wine இல் இயங்குமா? என்பது கேள்விக்குரிய ஒன்றாகும். ஆகையால் Virtual Box ஐ நிறுவி அதனுள் Windows7 இயங்குதளத்தை நிறுவினேன்.

எந்தவிதமான பிரச்சனையும் இல்லாமல் Windows7 இயங்குதளம் மிகவும் நன்றாக, உபுண்டு லினக்ஸிற்குள் இயங்குகிறது. இரண்டாவதாக உள்ள படத்தில் என்னுடைய மடிக்கணினியின் வன்பொருள்களின் பயன்பாடு கொடுக்கப்பட்டுள்ளது. உபுண்டு, Windows7 இரண்டு இயங்குதளத்திற்கும் சேர்த்து Processor 14% சதவீதம்தான் பயன்படுத்தப்படுகிறது. உபுண்டுவிற்குள் இருக்கும் கோப்புகள் அனைத்தையும் Virtual Box ற்குள் இருக்கும் Windows7 இயங்குதளத்திற்குள் காண முடிகிறது. இது ஒரு மிகப்பெரிய வசதியாகும்.



முழுமையாக லினக்ஸை மட்டுமே பயன்படுத்த வேண்டும் என ஆசைப்படுபவர்கள், உபுண்டுவில், லினக்ஸில் செய்ய முடியாத சில வேலைகளுக்காக விண்டோஸ் இயங்குதளத்திற்குள் செல்ல வேண்டியுள்ளது.  அதற்கு சரியான தீர்வு Virtual Box ஆகும்.

அதெல்லாம் சரி தம்பி இதனால எங்களுக்கென்ன இலாபம்? அப்படினு கேக்குறீங்களா? நிறைய இருக்குங்க சொல்றேன் கேளுங்க.

இலாபம் ஒன்று:
உங்களுக்கு உபுண்டு லினக்ஸ்தான் மிகவும் பிடித்த இயங்குதளம். ஆனால் சில தவிர்க்க முடியாத வேலைகளுக்காக விண்டோஸ் இயங்குதளத்திற்குள் செல்ல வேண்டியிருக்கிறது. அதற்காக கணினியினை மறுதொடக்கம் செய்ய வேண்டியுள்ளது. Virtual Box ற்குள் Windows7 இயங்குதளத்தை நிறுவி வைத்தால், முக்கியமான இந்த பிரச்சனை சரியாகி விடும். விண்டோஸ் இயங்குதளம் வேண்டுமானால Virtual Box ஐ திறந்து windows7 இயங்குதளத்தை இயக்கி உங்களுடைய வேலைகளை செய்து விட்டு மூடி விடலாம். மறுதொடக்கம் செய்ய வேண்டியதில்லை அதனால் உங்களுக்கு நேரமும் அதிகம் மிச்சமாகும்.

இலாபம் இரண்டு:
இணையத்தில் இருந்து ஒரு கோப்பை தரவிறக்கம் செய்கிறீர்கள், ஆனால் அந்த அந்த கோப்பு .docx வடியில் இருக்கிறது. அதை Libreoffice Writer இல் திறக்கும் போது சரிவர தெரியவில்லை என்றால், உடனே அந்த கோப்பை virtual box ற்குள் இருக்கும் windows7 இயங்குதளத்திற்குள் சென்று திறந்து பார்த்துக்கொள்ளலாம்.

இலாபம் மூன்று:
உபுண்டு இயங்குதளத்திற்குள் இருக்கும் கோப்புகளையும் Virtual Box ற்குள் இருக்கும் Windows7 இயங்குதளத்திற்குள் கொண்டு வந்து பயன்படுத்த முடியும் என்பதால் நேரம் நமக்கு மிச்சமாகும். நமது வேலைகளையும் மிகவும் விரைவாக செய்ய முடியும்.

இதுபோல பல நன்மைகள் இதன்மூலம் உண்டு.



அடுத்தடுத்த பதிவுகளில் virtual box ஐ உபுண்டுவில் நிறுவுதல் மற்றும் window7 இயங்குதளத்தை Virtual box ற்குள் நிறுவுதல் பற்றி பதிவு செய்கிறேன்.

References:

Jan 12, 2014

வலைப்பக்க உருவாக்க கருவி Brackets Editor ஐ உபுண்டு 12.04 இல் நிறுவுதல்

தமிழ் CPU ந.ர.செ.ராஜ்குமார் வலைப்பக்க உருவாக்க கருவி Brackets Editor ஐ பற்றி ஒரு பதிவு எழுதியிருந்தார். அதைப் படித்துப் பார்த்தேன். அருமையான தகவல்களை அளித்துள்ளார். அதில் "தொடக்க நிலையில் மேக் இயக்கச் சூழலில் மட்டும் வெளிவந்த இக்கருவி தற்போது விண்டோஸ், உபுண்டு இயக்கச் சூழலிலும் கிடைக்கிறது" என்று எழுதியிருந்தார்.

Brackets Editor ஐப் பற்றி நான் சொல்வதைவிட தோழர். ராஜ்குமார் அவர்கள் மிகவும் அழகாகவும், தெளிவாகவும் கூறியுள்ளார். ஒரு முறை படித்துப் பாருங்கள்.

நமக்கு உபுண்டுவில் இந்த வசதி உண்டு எனச் சொன்னால்தான் போதுமே, உடனே அதைச் செய்துப் பார்த்துவிட வேண்டும். இந்தப் பழக்கம் நமக்கு இரத்தத்திலேயே ஊறிப்போச்சுங்க, ஆமாங்க. ஆகையால் Brackets Editor ஐ தரவிறக்கம் செய்வதற்காக அதனுடைய வலைப்பக்கத்திற்குச் சென்றேன்.


வலைப்பக்கத்தை திறந்த உடனேயே Download Brackets Sprint 35(LINUX) என கொடுக்கப்பட்டிருந்தது. அதைச் சொடுக்கினால் உபுண்டு லினக்ஸிற்கு ஏற்ற வகையிலே .deb வடிவில் கோப்பு தரவிறக்கம் ஆனது. 45MB அளவு இருந்தது.

முனையத்தைத் திறந்து cd Downloads எனக் கொடுத்து, அதன்பின் sudo dpkg -i brackets-sprint-35-LINUX32.deb என்று கொடுத்து Brackets Editor ஐ நிறுவினேன். கீழே இருக்கும் படத்தைப் பார்க்கவும்.




உபுண்டுவில் Brackets Editor இன் தோற்றம்:


தோழர் ந.ர.செ.ராஜ்குமார் கூறியது போல Brackets Editor ஆனது "முதல் முறை பயன்படுத்துபவரை திரும்பப் திரும்ப பயன்படுத்த வசீகரிக்கும் " கருவிதான். கல்லூரிகளில் மாணவர்களுக்கு இதுபோன்ற Editor களில் நிரல் எழுத கற்றுக் கொடுத்தால், ஆர்வமுடன் கற்றுக்கொள்வார்கள். அதைவிட்டுவிட்டு இன்றைக்கும் Notepad போன்ற Editor களிலேயே நிரல் எழுத கற்றுக்கொடுத்தால், வெறுப்புத்தான் ஏற்படும். ஆர்வம் ஏற்படாது.

Jan 11, 2014

உபுண்டு 12.04 LTS பதிப்பில் கூகுள் குரோம் இணைய உலாவியை நிறுவுதல்

கூகுள் குரோம் இணைய உலாவியை நாம் உபுண்டு லினக்ஸிலும் நிறுவி பயன்படுத்த முடியும். நெருப்பு நரி(Mozilla Firefox) இணைய உலாவியுடன் ஒப்பிடும் போது குரோம் இணைய உலாவி பயன்படுத்துவதற்கு சிறப்பாகவும், வேகமாகவும் இருக்கிறது. நெருப்புநரி உலாவியில் இரண்டு, மூன்று Tab களுக்கு மேல் திறந்து பயன்படுத்தும் போது சில நேரங்களில் ஸ்தம்பித்து விடுகிறது. இது ஒரு மிகப்பெரிய குறையாக நெருப்பு நரியில் இருந்து வருகிறது.

குரோம் உலாவியை நிறுவுதல்:

முதலில் இந்த முகவரிக்குச் சென்று உலாவியை தரவிறக்கம் செய்யவும்.





.deb வடிவில் தரவிறக்கம் ஆகும். Home/Downloads அடைவிற்குள் தரவிறக்கம் செய்யப்பட்ட கோப்பு சேமிக்கப்பட்டிருக்கும். முனையத்தை திறந்து cd Downloads எனும் கட்டளைவரியை கொடுத்து Enter Key யை அழுத்தவும். அழுத்திய பிறகு sudo dpkg -i google-chrome-stable_current_i386.deb என தட்டச்சு செய்து Enter Key ஐ அழுத்தவும்.



libxss1 பொதி நிறுவப்படாமல் இருக்கும். அதனால் பிழைச்செய்தி காண்பிக்கும். அதற்கு sudo apt-get -f install எனும் கட்டளையை இயக்க வேண்டும். இந்த கட்டளையை இயக்கியபிறகு libxss1 பொதி நிறுவப்பட்டு விடும் அதோடு குரோம் உலாவியும் நிறுவப்பட்டு விடும்.


அதன்பின் Dash Home ற்குச் சென்று chrome என தட்டச்சு செய்தால் உங்களுக்கு குரோம் உலாவி கிடைக்கும்.



Jan 7, 2014

External Hard disk லிருந்து GRUB Boot Loader மூலமாக Windows 7 இயங்குதளத்தை கணினியில் நிறுவுதல்

CD/DVD, USB Pendrive, Hard Disk, Network மற்றும் நேரடியாக இணையத்திலிருந்து நிறுவுவது என பல வழிகளில் இயங்குதளத்தை கணினியில் நிறுவலாம். இந்த முறைகளில் பெரும்பாலும் பயன்படுத்தப்படுவது CD/DVD மற்றும் USB Pendrive ஆகியவற்றின் மூலமாக நிறுவும் முறைகள்தான்.

ஒரு சிறிய கதை:
நான் பல்கலைக்கழகத்திலே பொறியியல் படிக்கும் போது  வழங்கப்பட்ட  Compaq 515 மடிக்கணினி Overheating பிரச்சனையால் தனது வாழ்க்கையை முடக்கிக்கொண்டு இயங்காமல் நின்றுவிட்டது. இந்த பிரச்சனையை சரி செய்ய எவ்வளவு ஆகும் என திருச்சியில் விசாரித்தப் போது  3,500 ரூபாய் வரை வரும் என சொன்னார்கள். அப்பொழுது பணம் கொஞ்சம் பிரச்சனையாக இருந்ததால் மடிக்கணினியினை சரி செய்யும் முயற்சியைக் கைவிட்டுவிட்டேன். 

அதன்பிறகு, நண்பர் கு.நீலகண்டன் அவர்களினுடைய மடிக்கணினியின் திரை(Monitor) உடைந்து விட்டதால் அதை பயன்படுத்தாமலே வைந்திருப்பதாகவும் அதை அவர் விற்கும் நோக்கத்தில் இருப்பதாகவும் தோழர் பா.சக்திவேல் அவர்கள் என்னிடம் கூறினார். அதை அவரிடமிருந்து விலை கொடுத்து வாங்கி , திரையை மாற்றி தற்பொழுது அந்த மடிக்கணினியைத்தான் பயன்படுத்தி வருகிறேன். மடிக்கணினியில் புதிதாக இணைத்த திரையின் விலை 3,700ரூபாய், ஒரு வருட உத்திரவாதமும் சேர்த்து.

சரி இந்த பழைய Compaq 515 மடிக்கணினியில் இருக்கும் Hard Disk ஐ என்ன செய்வது? அதில்தானே அனைத்து தகவல்களும் இருக்கிறது. அந்த தகவல்களையெல்லாம் எப்படி புதிய கணினிக்கு மாற்றுவது என யோசித்தேன். Laptop Hard Disk ஐ External Hard Disk ஆக மாற்றி பயன்படுத்த முடியும் என்ற செய்தியை இணையத்தில் தேடியதன் மூலம் அறிந்து கொண்டேன். Compaq 515 மடிக்கணினியினுடைய வன்வட்டினை எடுத்து External Hard Disk ஆக பயன்படுத்துவதற்கு முடிவு செய்தேன். அதற்கிடையில் எனது வகுப்புத் தோழர் ம.பாண்டியராஜன் அவர்களுக்கும் இதே Overheating பிரச்சனை வந்தது அவரும் ஒரு புதிய மடிக்கணினியை வாங்கி பழைய மடிக்கணினியில் இருந்த Hard Disk  இல் இருக்கும் தகவல்களை புதிய மடிக்கணினிக்கு மாற்றும் பொருட்டு திருச்சிக்குச் சென்று  External Hard Disk Adapter ஒன்றை வாங்கி அதில் Compaq 515 மடிக்கணினியின் வன்வட்டினை இணைத்து அதை USB Connector மூலமாக புதிய மடிக்கணினியுடன் இணைத்து தகவல்களை புதிய மடிக்கணினியில் மாற்றினார்.

நானும் ஒரு External Hard Disk Adapter ஐ ரூபாய் 350 கொடுத்து வாங்கினேன். அதன்பின்  பழைய Hard Disk லிருந்து என்னுடைய புதிய மடிக்கணினிக்கு தகவல்களை மாற்றினேன். பழைய Hard Disk 160GB அளவு கொண்டது. புதிய மடிக்கணினியில் இருக்கும் Hard Disk 320GB அளவு கொண்டது. ஆகையால் இட நெருக்கடியில்லாமல் கோப்புகளை எளிமையாக மாற்ற முடிந்தது.

தகவல்கள் அனைத்தையும் புதிய மடிக்கணினிக்கு மாற்றிய பிறகு, இந்த பழைய Hard Disk ஐ என்ன செய்வது? பழைய மடிக்கணினியில் Windows 7 + Ubuntu 12.04.1 LTS இயங்குதளத்தையும் நிறுவி வைத்திருந்தேன்.

நான் கடந்த ஐந்து வருடங்களாக LINUX For You Magazine னுடைய சந்தாதாரர். எந்த மாத இதழ் என்று சரியாக ஞாபகமில்லை. ஏதோ ஒரு இதழில், ISO Image லிருந்து நேரடியாகவே இயங்குதளத்தை பூட் செய்யலாம் எனும் தலைப்பில் ஒரு கட்டுரைப் படித்தேன். அந்த கட்டுரைப் படித்ததன் விளைவு? இனிமேல் நண்பர்களினுடைய கணினிக்கு இயங்குதளங்களை நிறுவுவதற்கு இந்த External Hard Disk ஐ பயன்படுத்திக் கொண்டால் என்ன? என்ற சிந்தனை எழுந்தது. ஏனென்றால் ஒவ்வொரு முறையும் இயங்குதளதை நிறுவுவதற்காக, விண்டோஸ் மற்றும் லினக்ஸ் என எதுவாக இருந்தாலும் , Pendrive ஐ எடுத்து அதன்பின் USB Creator மூலமாக இயங்குதளத்தை பென்டிரைவில் மாற்றி அதன்பின் நிறுவ வேண்டும். Hard Disk உடன் Pendrive ஐ ஒப்பிடும் போது, Pendrive மூலமாக நிறுவும் போது  மெதுவாகத்தான் நிறுவப்படும். ஆனால் Hard Disk லிருந்து நிறுவினால் நிறுவுதல் வேகமாக நடக்கும்.

இப்படி பல வழிகளில் தாறுமாறாக எனக்கு யோசனை வந்தது. சரி இனிமேலும் தாமதிக்கக்கூடாது. இதற்கான ஆயத்தப் பணிகளில் உடனே இறங்கிவிட வேண்டியதுதான் என முடிவு செய்து இணையத்தில் இது தொடர்பான அனைத்து தகவல்களையும் சேகரித்தேன். இதாங்க கதை, கதை முடிஞ்சதுங்க! இவ்வளவு நேரம் என்னோட  சொந்த கதையைப்  பொறுமையாக படித்ததற்கு நன்றி.

சரி விஷயத்துக்கு வர்றேன்.

இதற்கு முன், Ubuntu ISO கோப்பினை GRUB Boot Loader மூலமாக Live Mode ல் இயக்கிப் பார்த்த அனுபவம் இருந்தது. இது தொடர்பான கட்டுரையை கணியம் இதழுக்கு எழுதி அனுப்பி வைத்தேன். அதன்பின் அதை மறுபதிப்பாக என்னுடைய வலைப்பூவில் பதிவிடேன். அந்த பதிவை படிக்க இங்கு செல்லவும்.

தேவையான மென்பொருள்கள்:
2.GRUB Boot Loader
3.Windows 7 OS
4.External Hard Disk இல் NTFS FileSystem த்துடன் கூடிய ஒரு Partition

படி ஒன்று:
Windows 7 இயங்குதளத்தை நீங்கள் ISO கோப்பாக வைத்திருந்தால்,  Externel Hard disk -இல் எந்த  Partition லிருந்து  Windows 7 இயங்குதளத்தை இயக்க வேண்டுமோ , அதற்குள்ளே Extract செய்யவும். CD/DVD யில் வைத்திருந்தால் copy செய்து கொள்ளுங்கள். Externel Hard disk -இல் எந்த  Partition லிருந்து  Windows 7 இயங்குதளத்தை இயக்க வேண்டுமோ , அதற்குள்ளே Paste செய்யவும்.



படி இரண்டு:
grub4dos மென்பொருளை தரவிறக்கம் செய்து,  Windows 7 இயங்குதளத்தை எங்கு Extract அல்லது Paste செய்தீர்களோ அங்கேயே இதையும் Paste செய்யவும். grub4dos ன் அடைவிற்குள் இருக்கும் கோப்புகளைத்தான் Paste செய்ய வேண்டும். தனியாக அடைவாக Paste செய்யக்கூடாது.



படி மூன்று:
grub4dos னுடைய menu.lst எனும் கோப்பினைத் திறந்து அதிலுள்ளவைகளை நீக்கி விட்டு கீழ்காணும் வரிகளை சேர்க்கவும்.

color blue/green yellow/red white/magenta white/magenta 
timeout 30 
default /default 

title Install Windows7 
root (hd0,0) 
find --set-root /bootmgr 
chainloader /bootmgr 
savedefault --wait=59 

title reboot 
reboot 

title halt 
halt



படி நான்கு:
உபுண்டுவின் முனையத்தை(Terminal) திறந்து sudo nautilus எனக் கொடுத்து ,  உங்களுடைய Externel Hard Disk லிருக்கும் உபுண்டு லினக்ஸினுடைய boot partition க்குள் சென்று grub எனும் அடைவிற்குள்(Folder) இருக்கும் grub.cfg கோப்பினை திறக்கவும். அதில் 



### BEGIN /etc/grub.d/40_custom ###
எனும் வரிக்கு கீழே கீழ்காணும் வரிகளை சேர்க்கவும்.

menuentry "Grub4dos"{
set root='(hd0,msdos1)'
linux /grub.exe
}


சேர்த்த பிறகு grub.cfg கோப்பினை சேமிக்கவும்.

குறிப்பு: Externel Hard Disk -ன் C: னில் இவைகளை நான் செய்ததால் modos1 என்று கொடுத்துள்ளேன். நீங்கள் எந்த பார்ட்டிசியனுக்குள் இதை செய்கிறீர்களோ அதைப் பொறுத்து  msdos2, msdos3, msdo4 என எண்கள் மாறுபடும்.

படி ஐந்து:
கணினியினை  Restart செய்து விட்டு, உங்கள் கணினியினுடைய BIOS மூலம்(Boot Options) External Hard disk லிருந்து boot செய்யுங்கள் அப்பொழுது , GRUB ன் பூட் மெனுவில் Grub4dos என்று இருக்கும் அதை தேர்வு செய்து  Enter Key ஐ அழுத்தினால் அடுத்ததாக  Grub4dos ன் மெனு கிடைக்கும் அதில் Install Window7 என்பதை தேர்வு செய்து  Enter Key ஐ அழுத்தவும். அழுத்தியவுடன் உங்களுக்கு Windows7 இயங்குதளம் நிறுவுவதற்கான திரை கிடைக்கும்.

இனிமேல் நீங்கள் எப்பொழுதும் போல நிறுவுதலை தொடங்கலாம். இந்த முறை மூலமாக Windows 7 இயங்குதளத்தை இயக்கும் போது மிகவும் விரைவாக நிறுவ முடிந்தது. இனிமேல் நண்பர்களுக்கு இயங்குதளத்தை நிறுவிக்கொடுக்க Pendrive ஐ தேடி அலைய வேண்டியதில்லை! இந்த முறையை கண்டுபிடிக்க எனக்கு இரண்டு நாட்கள் தேவைப்பட்டது. ரொம்ப மண்டை காய்ஞ்சு போச்சுங்க!

போனஸ்!
GRUB Boot Loader ஐ பயன்படுத்தி CentOS மற்றும் Fedora 20 இயங்குதளங்களை நிறுவுவது எப்படி என்று அடுத்தடுத்த பதிவுகள் வர காத்திருக்கிறது!