Oct 28, 2013

கட்டற்ற மென்பொருள் செலவற்ற கல்வி

இன்று (28.10.2013 திங்கள்) வெளியாகியுள்ள தமிழ் இந்து நாளிதழில் புதியது அறிவோம் எனும் பகுதியில் 'கட்டற்ற மென்பொருள் செலவற்ற கல்வி' எனும் கட்டுரை வெளிவந்துள்ளது. தமிழ் இந்து பத்திரிக்கை 'தமிழால் இணைவோம்' என்று கூறினாலும், நான் தமிழ் இந்து பத்திரிக்கையினை படிக்க என்னுடைய கிராமத்தில் இருந்து பேராவூரணி நகரத்திற்கு வந்துதான் படிக்க வேண்டும்.  இந்த கட்டுரையினை பார்த்த உடன் ஆச்சரியமும், மகிழ்ச்சியும் ஏற்பட்ட அதே சமயத்தில், இந்த கட்டுரையினை எழுதியது யார் என்று ஆர்வத்தோடு பார்த்தால். அட நம்ம கணியம் இதழின் ஆசிரியர், சென்னை லினக்ஸ் பயனர் குழுவின் தலைவர் ஸ்ரீனிவாசன் சார்.  இந்த கட்டுரையில் Gcompris எனும் கல்வி மென்பொருளைப் பற்றி எழுதியுள்ளார்.


கட்டுரையினை அண்ணன் சி.சந்திரமோகன் அவர்களிடமிருந்து பெற்றுகொண்டேன். தோழியர் நதியா அவர்களின் உதவியோடு கட்டுரைத்தாளை வருடினேன் (Paper Scanning). வருடிய கட்டுரையினை கீழே கொடுத்துள்ளேன். பெரிதுபடுத்தி படித்துக்கொள்ளவும்.


Oct 26, 2013

Fullcircle Magazine -ல் எனது Ubuntu Desktop


Full Circle Magazine னினுடைய #78 வது இதழ் வெளியிடப்பட்டுள்ளது. அந்த இதழில் பக்கம் எண்: 49-ல் My Desktop எனும் பகுதியில் என்னுடைய Compaq 515 மடிக்கணினியில் நிறுவப்பட்டுள்ள Ubuntu 12.04.2 LTS ன் Screenshot வெளியிடப்பட்டுள்ளது.

எனக்கு இந்த செய்தி பெரும் மகிழ்ச்சியை அளிக்கிறது. உலகம் முழுவதும் இருக்கக்கூடிய உபுண்டு சமூகத்தினரால் கடந்த 6 ஆண்டுகளுக்கும் மேலாக மிகச்சிறப்பாக வெளிவந்துக் கொண்டிருக்கும் ஒரு மாத இதழில் அதுவும் உபுண்டு லினக்ஸிற்கென வெளிவரும் இதழில் கடைகோடித் தமிழனின் மடிக்கணினியில் இருக்கும் ஒரு உபுண்டு இயங்குதளத்தின் Desktop வெளியிடப்பட்டுள்ளதென்றால் அது எனக்கு பெரும் மகிழ்விற்குரிய செய்தி ஆகும்!

இதற்கு முன்னர் மரியாதைக்குரிய தோழர் சுப.தமிழினியன் அவர்களின் Ubuntu Desktop, Full Circle Magazine -ல் வெளியிடப்பட்டுள்ளது.

வெளியிட்டமைக்காக Full Circle Magazine இதழுக்கு எனது மனமார்ந்த நன்றியினை தெரிவித்துக்கொள்கிறேன்.

தங்களுடைய Ubuntu Desktop ம் வெளிவர வேண்டும்  என ஆர்வமுள்ள உபுண்டு லினக்ஸ் பயன்படுத்தக்கூடிய தோழர்கள் (Ubuntu, Kubuntu, Lubuntu, Xubuntu LinuxMint இவைகளில் ஒன்று) தங்களுடைய உபுண்டு Desktop ஐ அழகுபடுத்தி Screenshot எடுத்து(படம் பிடித்து) misc@fullcirclemagazine.org எனும் மின்னஞ்சல் முகவரிக்கு உங்கள் கணினியினுடைய முழு விபரங்களோடு அனுப்பி வையுங்கள். 

Oct 23, 2013

KDE Desktop Environment -ல் Dolphin File Manager க்குள் ~ கூடிய backup files உருவாவதை தடுப்பது எப்படி?


Kate மற்றும் Kwrite ஆகிய இரண்டு Text Editor களைக் கொண்டும் கோப்புக்களை உருவாக்கும் பொழுது நாம் கோப்பை எங்கு சேமிக்கிறோமோ அந்த இடத்தில் கோப்பின் பெயருடன் ~ குறியீடும் சேர்ந்து(கோப்பு பெயரின் இறுதியில்) ஒரு கோப்பு உருவாகிறது. அதிகமாக கோப்புக்களை நாம் உரை எழுதியில் உருவாக்கும் பொழுது இந்த backup கோப்புக்கள் தேவையில்லாத குழப்பத்தை உண்டாக்குவதோடு வன்வட்டில் ஒரு குறிப்பிட்ட அளவு இடத்தையும் ஆக்கிரமித்துக் கொள்கிறது.  இதை மிகவும் எளிதான முறையில் சரி செய்யலாம்.

Kate Text Editor -ல்



Menubar -> Settings -> Configure Kate ஐ சொடுக்கி Editor Component என்பதன் கீழ் இருக்கும் Open/Save தேர்வினை சொடுக்கி Advanced Tab என்பதை Click செய்து Backup and Save என்பதற்குள்ளே இருக்கும் Local Files எனும் Check Box -ல் இருக்கும் டிக் குறியினை நீக்கி விட்டு Apply Button சொடுக்கிய பிறகு Kate ஐ ஒரு முறை மூடி விட்டு மறுமுறை திறந்து நீங்கள் கோப்புக்களை உருவாக்கும் பொழுது இந்த Backup File கள் உருவாகாது.

Kwrite Text Editor - ல்



Oct 18, 2013

KDE Environment -ல் GTK Applications(gnome applications) அழகாக மற்றும் தெளிவாக தெரிய


oxygen-gtk widget நிறுவுவதற்கு முன் Mozilla Firefox 


                                    oxygen-gtk widget நிறுவிய பின் Mozilla Firefox

                                   
                                   oxygen-gtk widget நிறுவுவதற்கு முன் Libreoffice Writer


                                   oxygen-gtk widget நிறுவிய பின்  Libreoffice Writer 

Libreoffice, Chromium, Google Chrome, gEdit TextEditor ஆகியவைகள் GTK அடிப்படையிலான பயன்பாடுகள் என்பதால் oxygen theme ஐ பயன்படுத்தாமல் ஒரு மாதிரியாக windows 98 காலத்து Theme மைப்போல பழமையாக தெரிந்தது.  இந்த பிரச்சனையினை எப்படி சரி செய்வது என்று மறுபடியும் தேடுதல் வேட்டையில் இறங்கினேன்.   அதற்கும் கிடைத்தது தீர்வு.


Software Management -ல் oxygen எனத் தேடி oxygen-molecule என்பதை நிறுவிக்கொள்ளவும். 

oxygen-gtk எனும் Theme ஐ நிறுவிக்கொள்ள வேண்டும். அதற்கு அடுத்து GTK+Appearance பயன்பாட்டை KDE menu மூலமாக திறந்து Widget style என்பதில் oxygen-gtk என்பதை தேர்வு செய்து Apply button ஐ சொடுக்க(click) வேண்டும்.



இதை கொடுத்த பின்பு Gnome application களும் KDE யில் பயன்படுத்தப்படும் oxygen theme போல மிகவும் அழகாக தெரியும்.

இந்த settings ஐ மாற்றிய பிறகு Libreoffice Writer -ல் மட்டும் தமிழ் தட்டச்சு வேலை செய்யாது ஆகையால் home அடைவிற்குள் இருக்கும் .bashrc கோப்பினைத் திறந்து அதில் கீழ்காணும் ஒற்றை வரியினை சேர்க்க வேண்டும்.

export OOO_FORCE_DESKTOP=gnome

.bashrc கோப்பினை சேமிக்கவும்.  .bashrc கோப்பினை மூடிவிட்டு, ஒரு முறை logout செய்து விட்டு login செய்யவும்.  இப்பொழுது Libreoffice Writer அழகாக தோன்றுவதுடன், தமிழில் தட்டச்சும் செய்ய முடியும்.


Oct 17, 2013

KDE Desktop Environment -ல் தமிழ் தட்டச்சு ஒரு முழுமையான தீர்வு



நான் Gnome Desktop Environment ஐ தொடர்ந்து பயன்படுத்தி வந்தாலும் KDE Desktop Environment ஐ இன்னும் பயன்படுத்திப் பார்க்கவில்லையே என்ற நெருடல் என் மனதில் நீண்டகாலமாக இருந்தது. ஆகையால் என்னுடைய உபுண்டு 12.04 LTS இயங்குதளத்தில் KDE ஐ நிறுவுவது என முடிவு செய்தேன்.  தனியாக Kubuntu வை தரவிறக்கம் செய்து நிறுவுவதை விட உபுண்டுவிலேயே நிறுவி விட்டால்என்ன என முடிவு செய்தேன்.  அதற்கான உதவிகள மற்றும் வழிகாட்டுதல்கள் உபுண்டுவின் உதவிக்கனா இணையதள பக்கத்திலேயே தெளிவாக கொடுக்கப்பட்டுள்ளது.


இதில் சொல்லப்பட்டுள்ள படி முனையத்தில் sudo apt-get install kde-full எனக் கொடுத்து நிறுவினேன். 410 MB அளவிற்கு தரவிறக்கம் ஆனது இரண்டு மணி நேரம் எடுத்துக்கொண்டது. தரவிறக்கம் முடிந்தவுடன் நிறுவுதல் தொடங்கியது. login manager ஆக எதை வைத்துக்கொள்ள வேண்டும் என நிறுவுதலின் இடையில் கேட்டது ldm, kdm என இரண்டு தெரிவுகள் கிடைத்தது. நான் kdm என்பதை தேர்வு செய்து கொடுத்தேன். கணினியை மறுதொடக்கம் செய்து KDE plasma desktop என்பதை login manager -ல் தேர்வு செய்து உள்நுழைந்தேன்(login) உள்நுழைந்தவுடன் நான் முதலில் சோதனை செய்து பார்த்தது, தமிழ் தட்டச்சு வேலை செய்கிறதா என்றுதான்.


நான் உபுண்டுவில் தமிழ் தட்டச்சு செய்ய ibus ஐ பயன்படுத்துகிறேன். KDE Desktop Environment -ல் Libreoffice Writer -ல் ibus மூலமாக தமிழ் தட்டச்சு செய்யும் பொழுது மிகவும் நன்றாக வேலை செய்தது. எழுத்துக்கள்தான் தெளிவாக தெரியவில்லை ஆனால் அதே கோப்பினை pdf கோப்பாக மாற்றும் பொழுது எப்பொழுதும் போல தெளிவாக தெரிந்தது. அதனால் அதை நான் பெரிதாக கண்டுகொள்ள வில்லை பொதுவாக gtk அடிப்படையிலான gnome desktop environment -ல் பயன்படுத்துகின்ற அனைத்து applicaiton களிலும் தமிழ் தட்டச்சு நன்றாக வேலை செய்தது.  Qt அடிப்படையிலான KDE applicaiton கள் எதிலும் தமிழ் தட்டச்சு வேலை செய்யவில்லை.


அப்புறம் என்ன எப்பொழுதும் போல இணையத்தில் தேடுதல் வேட்டை ஆரம்பித்தது அதற்கிடையில் uim என்ற ஒன்றை நிறுவி சோதித்துப் பார்த்து மண்டை உடைந்து திரும்பியது வேறு கதை.  அதைப் பிறகு பார்த்துக்கொள்வோம்.  தீர்வும் கிடைத்தது.  மிகவும் எளிதான தீர்வுதான், தேடிக்கண்டுபிடிக்கதான் நேரம் அதிகமாக எடுத்துக்கொண்டது.

லினக்ஸ்+தமிழ் என நாம் எல்லோருக்கும் மிகவும் பழக்கமான நண்பர் இலங்கையிலிருந்து தீவீரமாக இயங்கிக் கொண்டிருக்கும் லினக்ஸ் தமிழ் ஆர்வலர் மயூரன் அவர்களின் கட்டுரையினைத்தான் நான் தமிழ் தட்டச்சு நிறுவுவதற்கு எப்பொழுதுமே பயன்படுத்துவேன்.


ibus-qt4 பொதி மேற்காணும் கட்டளை வரியில் விடுபட்டு உள்ளது.  Gnome Environment க்கு அது தேவையில்லை ஆகையால் மயூரன் அவர்கள் அதை நிறுவாமல் விட்டிருக்கலாம்.


தீர்வு:

ibus-qt4 எனும் ஒரு பொதி(package) நிறுவப்படாமல் இருந்ததே kde appliaction களில் தமிழ் தட்டச்சு வேலை செய்யாமல் இருந்ததற்கு காரணம்.

முனையத்தில் sudo apt-get install ibus-qt4 எனக்கொடுத்து அந்த பொதியினை நிறுவினேன்.
  



நிறுவிய பிறகு home அடைவிற்குள் இருக்கும் .bashrc எனும் கோப்பில் கீழ்காணும் வரிகளை சேர்த்தேன்.

export GTK_IM_MODULE=ibus
export XMODIFIERS=@im=ibus
export QT_IM_MODULE=ibus 
export OOO_FORCE_DESKTOP=gnome

கணினியினை மறுதொடக்கம் செய்துவிட்டு மீண்டும் KDE க்குள் உள்நுழைந்து பயன்படுத்திய பொழுது சரமாரியாக அனைத்து Applicaiton களிலும் பாரபட்சமின்றி நமது இனிய தமிழை தட்டச்சு செய்ய முடிந்தது.


சரி செய்த பின் - Kwrite Text Editor -ல் தமிழ் தட்டச்சு - இந்த பதிவு முழுவதையும் Kwriter லேயே எழுதி முடித்தேன்.

References:

Oct 7, 2013

கூகுள் குரோம் இணைய உலாவியில் தமிழ் ஒருங்குறி எழுத்து பிரச்சனை

என்னுடைய மடிக்கணினியில் உபுண்டு 12.04 LTS நிறுவியுள்ளேன்.  இணைய பயன்பாட்டிற்கு கூகுள் குரோம் இணைய உலாவியைப்  பயன்படுத்தி வருகிறேன். ஏனோ தெரியவில்லை பயர்பாக்ஸ்(நெருப்பு நரி) உலாவி சரிவர இயங்க மாட்டேன்ங்கிறது.  நானும் விரும்பி பயன்படுத்துவதில்லை.  தமிழக அரசின் இணையதளம் தொடர்பாக எழுத்துரு பிரச்சனை வந்ததால், சில ஒருங்குறி தமிழ் எழுத்துருக்களை இணையதளத்தில் இருந்து தரவிறக்கம் செய்து நிறுவினேன்.  வந்தது சிக்கல்!

இதற்கு முன்பாக நன்றாக தெளிவாக தெரிந்து வந்த தமிழ் எழுத்துக்கள் தெளிவில்லாமல் தெரிய ஆரம்பித்தது.   அப்புறம் என்ன எப்பொழுதும் போல இணைய தேடுதல் வேட்டை தீவிரமானது.   வேட்டையில் தீர்வை கண்டுபிடித்தேன்.

நான் எழுத்துருக்களை நிறுவுவதற்கு உபுண்டுவினுடைய இருப்பியல்பாக இருக்கும் வசதியையே பயன்படுத்தினேன்.


இந்த முறையில் எழுத்துருக்களை நிறுவும் பொழுது அது Home அடைவில் .fonts எனும் அடைவிற்குள் நிறுவப்படுகிறது.  ஆகையால் Home->.fonts அடைவிற்குள் சென்று நான் தரவிறக்கம் செய்து நிறுவிய இரண்டு எழுத்துருக்களையும் நிரந்தரமாக அழித்தேன்.  தீர்ந்தது பிரச்சனை!